Sampdoria oo boorsooyinkeeda ka qaadatay Serie A
MILAN (CIYAARO)—Sampdoria ayaa boorsooyinkeeda ka qaadatay horyaalka Serie A markii ay 2-1 qasaaro ah kala hoyaaday Palermo galabtay, waxeyna noqoneysaa markii ugu horeysay oo ay banaanka ugu baxdo horyaalka heerka 1aad ee Italy laga soo bilaabo 2003.
Kooxda ka dhisan magaalada Genoa-waxey u baahaneyd iney hesho guul si ay isku sii badbaadiso ilaa iyo ciyaarta kama danbeysta ah, laakiin guuldaradaasi waxey fursad siisay Lecce oo 2-0 kaga badisay Bari natiijadaasoo ka dhigan in Sampdoria ay 4 dhibcood ka hooseyso Lecce.
Bari iyo Brescia mar hore ayeey xaqiijiyeen iney laabteen, waxeyna xaqiiqsadeen ineysan sanadka soo socda aysan horyaalka ka sii ciyaari doonin .
Rajadii Roma ee aheyd iney sanadka soo socda ka qeybgasho isreebreebka Champions League waxaa salfatay 2-1 qasaaro ah oo ay ka soo qaadatay Catania.
Natiijooyinka ciyaarihii kale Fiorentina 1, Bologna 1; Cesena 1, Brescia 0; Chievo Verona 0, Udinese 2; Parma 1, Juventus 0.
Sunni Said Salah
