Man United oo difaacashada horyaalka ku bilowday guul
Manchester United ayaa horyaalka ay difaacaneyso ee Premier League ku bilowday guul kadib markii ay 2-1 kaga badisay West Bromwich Albion xalay , halka Andre Villas-Boas oo kulankiisii ugu horeeyay Chelsea ciyaarsiiyay uu ku dhameystay 0-0 uu la galay Stoke.
United, oo dooneysa iney sanadkaan qaado horyaalkii 20aad ee England, ayaa goolka guusha waxaa faraha ka saaray Ashley Young daqiiqadii 81aad. Wayne Rooney ayaa United u dhiibay hogaanka ciyaarta markii uu 1-0 ka dhigay ciyaarta daqiiqadii 13aad, goolka West Brom waxaa u dhaliyay daqiiqadii 37aad Shane Long kaasoo si fudud kubada ku dhaafiyay goolhaye David de Gea, goolkaasi wuxuu calaamatul su’aal dul dhigayaa goolhayaha reer Spain ee 20-sano jirka ah.
Kooxaha waaweyn ee horyaalka waxey todobaadkaan wada galeen bareejo kuwaasoo ay ka mid yihiin Chelsea, Arsenal iyo Liverpool. kooxda maalaayiinta dolar suuqa ku faraqeysa ee Manchester City waxey martigalin doontaa maanta Swansea.
