Bayern & Napoli oo isku ag dhacay, City oo guul taariikhi ah heshay
NAPLES, Italy (CIYAARO)—Bayern Munich ayaa wali hogaanka u heysa Group A tartanka Champions League markii ay 1-1 bareejo ah la gashay Napoli caawa oo talaada ah, walow kooxda 4ta mar koobkaan heysata guushii ay heli laheyd uu ka qasaariyay Mario Gomez oo laga qabtay gool rigoore ahaa loo dhigay.
Toni Kroos ayaa hogaanka u dhiibay Bayern 2 daqiiqo markii ay ciyaarto socotay. hayeeshee Napoli ayaa iska soo guday goolkaasi daqiiqadii 39d markii difaaca Bayern Holger Badstuber uu goolkaasi iska dhaliyay.
Sidaasi oo ay tahay Bayern waxey group-keeda ku hogaamineysaa 7 dhibcood, halka Napoli is oo ku soo xigta ay leedahay 5 dhibcood—2daasi kooxood wali lagama badin intii uu tartankaani socday.
Manchester City oo isla group-kaasi ku jirta waxey ku jirtaa booska 3aad iyadoo wadata 4 dhibcood markii ay 2-1 kaga badisay kooxda group-kaan ugu hooseysa ee Villarreal.
Sergio Aguero oo ciyaarta badal ku soo galay ayaa waqtigii dhimashada goolka guusha u dhaliyay Manchester City, waxeyna guushaan ay u tahay tii ugu horeysay oo ay taariikhdooda ka helaan Champions League.
Sunni Said Salah
