Barca oo guuldaradii 1aad ka soo kabatay
BARCELONA, Spain (CIYAARO)—Alexis Sanchez ayaa 2 gool oo uu u dhaliyay Barcelona waxey u si fudud ugu suuragalisay iney ka soo kabsato guuldaradii 1aad ee xilli ciyaareedkaan kadib markii ay 4-0 ku maasheysay kooxda Rayo Vallecano kulan ka tirsanaa Spanish league.
Rayo ilaa iyo daqiiqadii 29d waxey Barcelona u diiday iney wax gool ah ka dhaliso iyadoo ciyaartu ay ka dhaceysay Camp Nou, hayeeshee weeraryahanka reer Chile ayaa goolkiisii 1aad ee xilli ciyaareedkaan ciyaarta ku daahfuray daqiiqadii 29aad. Sanchez ayaa 2-0 ka dhigay daqiiqadii 41d halka David Villa uu 3-0 ka dhigay 2 daqiiqo kadib.
5 daqiiqo kadib markii ay bilaabatay qeybtii labaad ayaa Lionel Messi goolkiisii 26aad ee xilli ciyaareedkaan uu ka dhaliyay Rayo daqiiqadii 50d, sidoo kale goolkaasi wuxuu ahaa kiisii 16aad ee horyaalka Spain, waxeyna sidaa gool dhalinta iskugu heystaan Cristiano Ronaldo oo ay wada leeyihiin min 16 gool.
Barca, isla todobaadkaan waxaa 1-0 qasaaro ah ay ka qaadatay Getafe, guuldaradaasi oo soo afjartay 27-kulan oo aan laga badin Barca tan iyo bishii April, ee sanadkaan , waxey haatan 3 dhibcood ka hooseysaa Real Madrid.
Ciyaartaan waxey aheyd mid la soo hormariyay , waxey aheyd in la ciyaaro Dec. 17-18 laakiin Barcelona xilligaasi waxey joogi doontaa dalka Japan oo ay kaga qeybgaleyso koobka kooxaha aduunka ee Club World Cup.
Madrid, waxey hogaanka ku heysaa 34 dhibcood, Barcelona oo ku soo xigta waxey leedahay 31 dhibcood halka Valencia oo booska 3d ku jirta ay leedahay 27 dhibcood.
