Xulka kubadda cagta ee Soomaaliya ayaa boorsooyinkiisa ka qaadan doona  tartanka xulalka Bariga iyo Bartamaha Africa ee CECAFA ee ka soconaya dalka Tanzania kadib markii uu guuldaradii 2aad ee tartankaasi uu kala hoyaaday xulka Uganda.

Soomaaliya oo ku jirta Group-ka B ayaa waxaa loo saariyay 4-0 guuldaro ah markii ay meel ka baxsan caasimada dalka Tanzania ay isku hardiyeen  Uganda oo ka mid ah xulalka ugu awooda badan gobolka.

Uganda ayaa si weyn uga gacan sareeysay xulka Ocean Stars ee Soomaaliya oo ay ka muuqatay tabardari aad u weyn, gaar ahaan qeybtii danbe ee ciyaarta oo goolashu wada dhasheen, iaydoo  qeybtii hore 0-0 lagu kala nastay. walow ciyaartu intii ay socotay Captainka  xulka Soomaaliya Yaasiin Jareere iyo ciyaaryahan Uganda ka tirsanaa garoonka laga saaray markii calaamadda casaanka ah la wada siiyay.

Ciyaaryahanka dhexda uga dheela Uganda ee Dan Wagaluka ayaa daqiiqadii 48-aad bilowgii qeybta danbe daah furey goolka koowaad, Xulka  Soomaaliya waxey isku dayeen  iney qaab difaac ah ciyaaraan si ay iskaga ilaaliyaan  goolal kale.

Laakiin weeraryahanka Uganda oo lagu magacaabo Emanuel Owki ayaa goolasha sadexleyda ah oo 3da gool ah ka dhaliyay Soomaaliya daqiiqadihii 63, 82, iyo 90-aad taasoo 4-0 guuldaro ah u saarisay Soomaaliya.

Xulka Soomaaliya kulankii ugu horeeyey ee tartankaan oo ahaa kii furitaanka oo ay ciyaareen maalintii jimcah aheyd waxaa 4-1 kaga adkaatay Burundi, sidaa dartee Soomaaliya waxey xaqiiqsatay iney iskaga hartay gabi ahaan tartanka  CECAFA Senior Challenge Cup 2011.

Maalinta Khamiista ah ayeey kulanka 3aad ee u harsan Soomaaliya la ciyaari doontaa Jaziirada Zanzibar , waxaana la sheegayaa in ay kulankaasi ka maqnaan doonaan ilaa 4 ciyaaryahan, inkastoo uusan kulankaasi wax qiimo ah ugu fadhin hadana waxey kulankaasi kadib u soo guryo noqon doonaan Muqdisho.

Group-ka B oo ay Soomaaliya ku jirto waxaa hogaanka u haya Xulka Uganda oo 6 dhibcood leh, Burundi 4 dhibicoo, Zansibar 1 dhibic ,  Soomaaliya wax dhibci ah ma lahana ilaa iyo hada.

C/xafiid C/samad Zaciimka