Bayern Munich ayaa qorsheyneysa inay Jamal Musiala u soo bandhigto heshiis weyn, kaasoo noqon kara mid shan sano ah oo qiimihiisu gaarayo €120 milyan.
Jamal Musiala ayaa xulka Jarmalka bandhig fiican ka sameeyay intii lagu jiray fasaxa caalamiga ah. Laacibkan 21-jirka ah ee khadka dhexe weerarka kaga ciyaara ayaa qaab ciyaareed heer sare ah ku soo bandhigay Bayern Munich, isagoo dhaliyay goolal wax ku ool ah oo guulo muhiim ah u horseeday kooxda. Musiala ayaa ah magaca ugu badan ee laga hadal hayo jarmalka maadaama uu galay 18-kii bilood ee ugu dambeeyay qandaraaskiisa Bayern.
Xiddiga xulka Jarmalka ayaa filaya inuu helo warar rasmi ah oo ku saabsan cusboonaysiinta qandaraaskiisa inta lagu jiro fasaxa jiilaalka. Bayern ayaa wada-hadallo wanaagsan la yeelatay xiddigan weerarka ah, Musiala-na wuxuu si cad u sheegay inuu doonayo inuu sii joogo Munich. Waxaa jira fursad weyn oo ah inuu saxiixo heshiis cusub oo uu ku sii joogo Die Roten.
Sky Sports ayaa shaacisay macluumaadka dhaqaale ee xiisaha leh ee ku saabsan qandaraaska cusub ee Musiala.Da’da yarka weerarka ah ayaa mushahar dhan €25 milyan qaadan doona sanadkiiba, waxaana uu saxiixi doonaa heshiis soconaya ilaa ugu yaraan 2029.
Sidoo kale, Musiala ayaa la filayaa inuu helo lacag gaar ah asaga iyo wakiilkiisa. Sida hadda loo fahansan yahay, Sky Sports ayaa soo warisay in xirmada dhaqaale ee heshiiska cusub ee Musiala ay ku dhowaan doonto €120 milyan. Waa maalgashi culus oo ay Bayern ku sameyneyso xiddigga dhalinyarada ah ee 21 sano jirka ah.
