Daafaca kooxda Real Madrid ee Dani Carvajal ayaa shaaca ka qaaday in uu dhaawac halis ah ka soo gaadhay kulankii ay kooxdiisu la ciyaartay kooxda Villarreal ee horyaalka La Liga habeenkii sabtida.
Ciyaaryahanka heerka caalami ee dalka Spain ayaa dhaawac jilibka ah ka soo gaaray markii ay isku dhaceen Yeremy Pino oo ka tirsan Villarreal, waxaana uu ilmeeyay markii uu garoonka ka baxayay.
Carvajal ayaa subaxnimadii hore ee Axadda soo dhigay baraha bulshada si uu u muujiyo in uu dhaawac halis ah soo gaadhay isla markaas uu qaliin mari doono.
“Dhaawac halis ah ayaa iga soo gaadhay jilibka waa inaan qaliin maro oo aan garoonka ka maqnaan doonaa dhowr bilood,” ayuu ku soo qoray Instagram-ka.
“Waxaan aan haatanba bilaabayaa soo kabashasada si aan u soo laabto aniga oo ka xoogan sidii hore, Dhammaantiin aad baad ugu mahadsan tihiin fariimahaaga, waxaan dareemayaa in la jecel yahay.”
