Da’yarka Barcelona ee Lamine Yamal ayaa qirtay arrin lama filaan ah kadib markii uu bandhig heer sare ah ka sameeyay kulankii  Champions League ee ay Borussia Dortmund kaga badiyeen 3-2.

Wareysi uu siiyay Movistar, Yamal ayaa sheegay in ciyaarta dhexdeeda uu dareemay inuu “kaadi ku ciyaarayay,” taasoo keentay in lagu xannibo tijaabooyinka ka-hortagga maandooriyaha kadib ciyaarta.

Yamal, oo kasoo kabsaday dhaawac canqowga ah, ayaa muujiyay bandhiggiisii ugu fiicnaa tan iyo intii uu ku soo biiray kooxda koowaad ee Barca, isagoo door weyn ku lahaa guusha ay kooxda reer Spain ku gaartay kaalinta labaad ee heerka group-yada Champions League.

Wuxuu si gaar ah ugu gacan siiyay goolkii guusha ee Ferran Torres, isagoo kubbad cajiib ah daba mariyay baas qurux badan daafacyada daqiiqaddii 85-aad.

17-jirkan ayaa muujiyay xirfad iyo garasho ciyaareed sare, isagoo go’aansaday inuu baas xirfadeed u dhiibo Ferran halkii uu u sii gudbin lahaa Fermin Lopez, oo isna fursad fiican heystay. Goolkaas ayaa Barca u xaqiijiyay saddex dhibcood oo muhiim ah.

“Ferran waxaan isku fahamnay si fiican, sidii kulankii Real Betis,” ayuu yiri Lamine oo ka hadlayay xiriirka wanaagsan ee uu la leeyahay Torres.

Ferran, oo kulankaas labo gool dhaliyay, ayaa muujiyay farxaddiisa kadib ciyaarta, isagoo abuuray sawir xusuus leh oo uu Lamine kabihiisa ugu nadiifinayo si kaftan ah –oo ka dhigan astaanta saaxiibtinimada iyo wada shaqaynta kooxda.