Enzo Maresca oo Digniin u Diray Xiddigaha Chelsea Iyadoo Uu Diiday Inuu soo hadal qaado Rajada Horyaalka.
Tababaraha Chelsea, Enzo Maresca, ayaa ka digay in kooxdiisa aysan ku mashquulin fikradaha ku saabsan tartanka horyaalka Premier League, inkastoo ay guul xiiso leh ka gaareen Tottenham kulankii 4-3 ee todobaadkan. Guushan ayaa Chelsea ka dhigtay inay afar dhibcood oo kaliya u jiraan kooxda hoggaanka haysa ee Liverpool, oo weliba kulan baaqi ah u harsan yahay.
Maresca, oo si taxadar leh uga hadlay rajada Chelsea ee hanashada horyaalka, wuxuu ku adkeystay in diiradda la saaro ciyaarba ciyaarta xigta.
“Waxaan ku jirnaa habeen wanaagsan, laakiin waa in aan is xakameynaa oo aanan isdhigan,” ayuu yiri Maresca. “Inaad ku mashquusho hal kulan, labo kulan, ama halka aad joogto gebi ahaanba waa khalad. Waxa ugu muhiimsan waa in aan maalinkasta si fiican u shaqeyno oo aan diiradda saarno kulanka xiga.”
Tababaraha ayaa sidoo kale sheegay in guushii ay ka gaareen Tottenham ay muujisay awoodda maskaxeed ee kooxda, taasoo ah tan ugu da’da yar Premier League. “Shaki kuma jiro in tani ay tahay guul muhiim ah,” ayuu raaciyay.
Chelsea ayaa hadda dadaal ugu jirta inay sii xoojiso natiijooyinkooda si ay ugu tartanto meelaha sare ee horyaalka.
