Saxiixa xagaaga Federico Chiesa ayaa shaaca ka qaaday inay ahayd wax cajiib ah inuu ku ciyaaro Anfield ka dib markii uu kulankiisii ugu horeysay u saftay Liverpool kulankii Bournemouth.
Xiddiga reer Italy ayaa lagu badalay Luis Diaz qaybtii dambe waxana uu ciyaaray 18-kii daqiiqo ee ugu dambeeyay ciyaarta.
Chiesa ayaa birta ku dhuftay kubad waxana uu ku dhawaaday in uu dhaliyo goolkiisii ugu horeeyay ee Liverpool.
Mar la weydiiyay website-ka Liverpool haddii Anfield uu ka soo baxay wixii uu filayay, Chiesa ayaa ku jawaabay: “Haa, haa, haa, way dhacday! Maqalka ‘You’ll never Walk Alone’ markii ugu horeysay, waxay ahayd cajiib”.
“Waxay ahayd wax cajiib ah sidoo kale kulankii Nottingham Forest, laakiin nasiib daro waanu guuldaraysanay, laakiin maanta runtii waxay ahayd wax cajiib ah, wax kasta oo ka mid ah waan ku riyaaqay”.
