Go’an laga gaaray Mustaqbalka Thiago Silva ee Kooxda Chelsea

Kooxda kubadda cagta Chelsea ayaa go’aan cusub ka gaadhay mustaqbalka difaaceeda ruug-caddaaga ah ee Thiago Silva oo ay da’diisu noqonayso 39 jir, kaas oo ay si aad ah ugu tiirsan tahay kooxda tababare Graham Potter oo uu u yahay difaaca ay ugu kalsoonida badan yihiin.

Chelsea ayaa la sheegay in ay ku jirto marxalad kala guur ah, isla markaana xilli ciyaareedkan uu u yahay mid ay kaliya iskugu diyaarinayaan fasalka dambe oo ay si dhab ah iskula jaan-qaadi doonaan saxeexyada tirada badan ee ay sameeyeen.

Suuqa iibka ciyaartoyda ee bishan January ayay Chelsea si fiican uga faa’iidaysatay, waxaanay la saxeexatay ciyaartooyo badan oo uu ku jiro daafacii Monaco ee Benaoit Badiashile oo kulamadii ugu dambeeyey kusoo garab bilaabanayay Thiago Silva. Waxa kasii horreeyey oo xagaagii ay la saxeexdeen Wesley Fofana iyo Kalidou Koulibaly, halka ay kooxda sii joogaan revoh Chalobah iyo Thiago Silva. Waxa intaas u dheer in Cezar Azpilicueta uu ka ciyaari karo daafaca dhexe.

Sida uu qoray wargeyska The Times, Chelsea ayaa waxay ruuq-caddaageeda Thiago Silva doonaysaa inuu ku sugnaado Stamford Bridge inta ay ciyaartoyda cusub ee difaacyahannada ah si fiican iskula qabsanayaan, taas oo ak dhigan in qandaraaskiisa hadda oo ay lix bilood  ka hadhsan yihiin lagu kordhin doono sannad kale.

Silva oo bishii September ay da’diisu noqotay 38 jir, ayaan diidmo ka keenayn qorshaha kooxdiisa ee kusii haynaya Stamford Bridge illaa inta ay da’diisu ku dhowaanayso 40 jirka, iyadoo waqtigaasna ay dhinacyadu isla eegi doonaan haddii uu laacibkani jidh ahaan iyo farsamo ahaanba sii ciyaari karayo.

August 2020 ayuu Thiago Silva si bilaash ah ugu soo wareegay Chelsea markii uu dhamaaday qandaraaskiisii Paris Saint-Germain, waxaana uu illaa hadda u saftay 95 ciyaarood oo uu kusoo bilowdaya iyo toban uu beddel ku yimid, waxaanu kula guuleystay Champions League iyo Club World Cup.

Wararka Ciyaaraha

Be the first to comment

Leave a Reply

Your email address will not be published.


*