Arsenal ayaa soo dhaweyneysa kooxda bilaa tababaraha ah ee Crystal Palace maanta kulan ka tirsan horyaalka Premier League iyadoo kabtankoodii hore Patrick Vieira laga ceyriyay shaqada garoonka Selhurst Park.
Gunners ayaa sideed dhibcood ku qaban karta hogaanka horyaalka Premier League haddii ay badiyaan halka Crystal Palace ay dooneyso inay soo gabagabeyso 12 kulan oo isku xigta oo aysan wax guul ah gaarin.
Arsenal waxaa weli qalbi xanuun ku ah sidii ay uga soo hareen koobka Europa League maalintii Khamiista iyadoo ay rigoore ku reebtay kooxda Sporting Lisbon, laakiin waxay rajeynayaa inay wadada guusha ku soo noqdaan maanta.
XOGTA KULANKA
Kulanka: Arsenal vs Crystal Palace
Garoonka: Emirates Stadium
Garsoore: Stuart Atwell
Waqtiga: 5pm Saacada Geeska Afrika
MAXAA CUSUB?
Tababaraha da’ yarta kooxda Crystal Palace ahna kabtankoodii hore Paddy McCarthy ayaa kulanka maanta hogaamin doona Crystal Palace ka dib markii la ceyriyay tababare Patrick Vieira.
Albert Sambi Lokonga kama hor imaan karo kooxdiisa Arsenal, Will Hughes iyo James McArthur ayaa weli shaki ku jiraa sababo la xiriira xumad ay qabaan halka goolhaye Vicente Guaita laga yaabo inuusan taam u noqonin kulanka maanta.
Daafacyada Arsenal Takehiro Tomiyasu iyo William Saliba ayaa labadooda dhaawacyo loo bedelay kulankii Sporting.
Dhaawaca dhabarka ee Saliba ayaa laga yaabaa inuu ka soo bogsado ka hor kulanka maanta.
SHAXDA MACQUULKA AH:
Arsenal: Ramsdale; White, Holding, Gabriel, Tierney; Odegaard, Partey, Xhaka; Saka, Trossard, Martinelli
Crystal Palace: Whitworth; Clyne, Andersen, Guehi, Mitchell; Hughes, Doucoure, Schlupp; Olise, Edouard, Zaha
MA OGTAHAY?
Crystal Palace waxay badisay kaliya labo ka mid ah 22 kulan oo ay marti u aheyd Arsenal horyaalka Premier League, 2-1 oo ay kaga badiyeen garoonka Highbury sannadii 1994kii iyo 3-2 oo ay kaga badiyeen Emirates Stadium 2019kii.
Si kastaba, Arsenal ayaa dhibco dhumisay mid kasta oo ka mid ah afartii kulan ee ugu danbeysay ee ay martigeliyeen Crystal Palace, guuldaradii 2019kii waxaa ugu xigtay seddex barbaro.
