Xiddiga kooxda Real Madrid ee Jude Bellingham ayaa ka hadlay wararka sheegaya in xiddiga Liverpool Trent Alexander-Arnold uu ku biiray kooxda Real Madrid.
Magaca Alexander-Arnold ayaa lala xiriirinayay inuu u dhaqaaqayo Real Madrid si uu u xoojiyo booska daafaca midig ka dib dhaawacii mudada dheer ee Dani Carvajal.
Warar ay daabaceen warbaahinta ayaa sheegay in maamulka Real Madrid ay la hadli doonaan dhigooda Liverpool ka hor kulanka labada kooxood ee champions League si ay uga hadlaan mustaqbalka xiddiga.
Jude Bellingham ayaa yiri: “Miyaan rabaa inaan la ciyaaro Arnold? Horay ayaan tan u sameeyay maadama aan ka garab ciyaaray xulka qaranka, laakiin haatan waa xiddig Liverpool ah, aniguna waxa aan joogaa Real Madrid sidaas darteed kama hadli karo arintaas”.
“Waa saaxiib wanaagsan,” ayuu sii raaciyay. “Waan arki doonaa waxa dhaca.”
Waxaa xusid mudan in Alexander-Arnold qandaraaskiisa Liverpool uu dhacayo xagaaga soo aadan.
