Lamine Yamal Oo Kashifay Waxa Uu Aad Ugu Qadariyo Lionel Messi Ka Dib Farriin Uu Ka Helay Halyeeyga Barcelona.

Xiddiga da’da yar ee Barcelona, Lamine Yamal, ayaa shaaca ka qaaday waxa uu uga daydo halyeeyga kooxda iyo xiddiga Inter Miami, Lionel Messi, kadib markii uu ku guuleystay abaal-marinta Golden Boy.

Messi ayaa fariin dhiirrigelin ah u diray Yamal iyo Vicky Lopez, oo labaduba ku guuleystay abaalmarino muhiim ah xafladdii Golden Boy Gala. Halyeeyga reer Argentina ayaa bartiisa bulshada ku soo qoray: “Lamine, Vicky: abaalmarintani waa natiijo ka dhalatay karti, shaqo adag iyo naf-hurnimo. Aad ayaan ugu faanayaa inaad qayb ka tihiin Barcelona. Hambalyo, waana inaad horay usii socotaan!”

Yamal oo ka jawaabaya fariinta Messi ayaa sheegay waxa uu aad ugaga daydo xiddiga koobka adduunka ku guuleystay: “Ugu dambeyn, waxa aan ugu jecelahay qaabka Messi uu wax walba u fududeeyo. Waa tusaale fiican oo ay dhamaan carruurta ku daydaan.”

Iyadoo Yamal marar badan lala barbardhigay Messi tan iyo markii uu ka soo muuqday garoomada, hadana xiddiga 17-jirka ah ayaa horumar u gaar ah ka sameynaya kooxda Barcelona. Waxa uu durba noqday ciyaaryahan muhiim ah oo ay ku tiirsan tahay kooxda Catalonia, inkastoo uu weli aad u da’yar yahay.

Yamal sidoo kale waxa uu door muhiim ah ka ciyaaray xulka qaranka Spain, isagoo gacan ka geystay guushii xulka ee tartankii European Championship xagaagii hore.

Waxaa muuqata in Lamine Yamal uu leeyahay mustaqbal ifaya, iyadoo Messi-na uu weli door weyn ku leeyahay dhiirrigelinta jiilka cusub ee kubadda cagta.