Ciyaaryahanka khadka dhexe ee Manchester City Phil Foden “wuxuu ku soo laaban doonaa” qaab ciyaareedkiisii ugu fiicnaa ka dib markii uu si hoose ku bilowday xilli ciyaareedkan, waxaa sidaasi yidhi Tababare Pep Guardiola.
Foden ayaa 27 gool u dhaliyay City xilli ciyaareedkii hore waxaana loo magacaabay xiddiga sanadka ee EPl-ka, laakiin ma muuqdo xilli ciyaareedkan, isagoo ka caawiyay England inay gaarto finalka Euro 2024 xagaagii.
Afar ka mid ah shantii kulan ee uu City u saftay ayuu bedel ku soo galay, isagoo kaliya ku soo bilowday kulankii Watford ee Carabao Cup.
Si kastaba ha ahaatee, Guardiola ayaa sheegay inuu rajeynayo in 24-sano jirkaan uu dib u helo qaab ciyaareedkisii iyadoo City ay u safreyso kooxda Slovakia ee Slovan Bratislava Talaadada caawa ah kulan ka mid ah Champions League-ga.
Foden weli wax gool ah ma dhalin xilli ciyaareedkan, laakiin kulanka caawa wuxuu heeysta fursadda ugu fiican ee uu ku furi karo akoonkiisa.
City ayaa raadineysa guusheedii ugu horeysay ee xilli ciyaareedkan tartanka dib loo cusbooneysiiyay ee Champions League-ga, ka dib markii ay barbaro 0-0 ah gurigooda kula galeen Inter Milan kulankoodii furitaanka.
