Madaxa Ballon d’Or Vincent Garcia ayaa sharaxay sababta Vinicius Jr uu u waayay abaalmarinta.

Xiddiga Real Madrid ayaa ku dhameystay kaalinta 2-aad ee isaga oo ka dambeeyay xiddiga khadka dhexe ee Manchester City ee Rodri.

Los Blancos ayaa si uga xanaaqday in aanu xiddiga reer Brazil ku guulaysan abaalmarinta waxana ay soo saareen warbixin ay ku weerarayaan Guddiga qaban-qaabada abaalmarinta.

Kooxda La Liga ayaa sheegtay in ururka iyo Uefa “aanu ixtiraamin” kooxda.

Kooxda ayaa sidoo kale diiday in ay ka qeyb galaan xaflada ka dhacaysa magaalada Paris sababo la xiriira caro ay ka qaadeen natiijada.

Si kastaba ha ahaatee, Garcia ayaa hadda sharaxay hal sabab oo Vinicius Jr u seegay abaalmarinta.

Waxa uu yiri: “Sida iska cad, Vinicius waxaa hubaal ah in uu la dhibtoonayay joogitaanka Bellingham iyo Carvajal ee shanta sare, sababtoo ah, xisaab ahaan, taasi waxay dhibco ka qaadatay isaga”.

“Tani waxay sidoo kale soo koobeysaa xilli ciyaareedka Real Madrid, kaasoo qaatay inta u dhaxeysa seddex ilaa afar ciyaaryahan, garsoorayaasha ayaana la wadaagay go’aanadooda, taasoo faa’iido u ah Rodri”.

Garcia ayaa hadalkiisa sii raaciyay: “Aad ayaan Runta ugu sheegnay Real Madrid iyo dhamaan kooxaha kale”.

“Sanadkan, qofka ku guulaysta iyo waliba qiimaha abaalmarinta lama ogeysiin doono kooxaha”.