Daqiiqadii 71aad Argentina waxaa loo dhigay rigoore markii Denzel Dumfries uu geeska xerada ganaaxa qalad ku galay Acuna. Waxaa rigoore u soo istaagay Lionel Messi oo gool u sarifay, wuxuuna goolkaas ku barbareeyay rikoodhkii Gabriel Batistuta ee Argentina ee Koobka Adduunka iyagoo wada leh haatan 10 gool.

Netherlands oo qeybtii labaad ciyaar fiican soo bandhigeysay ayaa ciyaarta ku soo laabatay daqiiqadii 83aad markii karoos uu soo dhigay Berghuis uu madax ku dhaliyay Wout Weghorst oo ciyaarta ka dhigay 2-1.

Daqiiqadii 89aad ciyaartoyda labada dhinac ayaa ku dhawaaday inay gacanta iskula tagaan markii Leandro Paredes oo laga dhigay qalad uu ku galay Ake uu arkay kubada oo sii baxeysa, wuxuuna si xoogan ugu sii darbeeyay ciyaartoyda kursiga keydka Netherlands.

Ciyaarta ayaa lagu daray 10 daqiiqo oo dheeri ah iyadoo Netherlands ay u muuqatay mid quusatay madaama Argentina ay kubada difaacanayeen laakiin daqiiqadii ugu danbeysay ee 10kii daqiiqo ee dheeriga ahaa ayaa Netherlands loo dhigay laad xor ah meel aan ka fogeyn goolka Waxana kubada loo dusiyay Weghorst oo ciyaarta ka dhigay 2-2 guud ahaan waqtiga dheeri ee lagu daray waxa uu ku soo dhamaaday bar-baro.

Goolhaye Emi Martinez ayaa mar kale Argentina rigoore ku soo saaray isagoo labo rigoore ka qabtay Berghuis iyo Virgil van Dijk taasoo u ogolaatay Argentina oo iyagana rigoore iska qasaariyay inay 4-3 ku badiyaan.