Pep Guardiola ayaa shaaca ka qaaday waxa ku qasbi kara inuu ka tago shaqada Manchester City haddii uu ku guuldarreysto inuu ka soo saaro kooxda xaaladda adag ee ay ku jirto.

City ayaa wajahaysa kulanka Manchester derby Axadda  iyadoo hal guul kaliya ka heshay 10-kii kulan ee ugu dambeysay, waxayna guuldarro 2-0 ah kala kulmeen Juventus toddobaadkii hore taasoo halis gelisay rajadooda u soo bixitaanka wareegyada dambe ee  Champions League.

Guardiola weligiis ma uusan wajahin xaalad sidan u xun inta uu tababare ahaa, waxaana City ay ka dhacday kaalinta shanaad ee  Premier League, iyagoo ka dambeeya Nottingham Forest.

Bishan soo socota, City waxay wajahaysaa kulamo adag oo ay ku jiraan kuwa ka dhanka ah United, Aston Villa, Everton, Leicester, West Ham, Salford City, iyo Brentford.

Guardiola ayaa sheegay inuu ka tagi doono shaqada kooxda Etihad haddii uu dareemo inuu waayay taageerada ciyaartoydiisa, inkastoo uu bishii hore saxiixay heshiis kusii heynaya kooxda ilaa 2027.

“Marka aan dareemo inay tahay waqtigii aan ka tegi lahaa, waan ka tagi doonaa. Haddii aan guuldarraysto bil kale oo aan guul la’aan sii ahaado, waxaan dhahayaa, ‘ragga, waa inuu maamulo qof kale oo hagaajiya waxyaabaha noocan ah,’ maxaa yeelay ma noqon karto mid waarta,” ayuu yiri.

“Waxaa jira hal xaalad oo aan is leeyahay, ‘Pep, waa inaad ka fikirtaa,’ taasina waa marka aan waayo kooxda, marka aan dareemo inay ordi waayaan, inay war iga maqli waayaan.