Kooxda kubadda cagta Real Madrid ayaa xagaaga weerar ku qaadi doonta naadiga hoggaaminaya horyaalka Premeir League ee Arsenal oo ay ka doonayaan xiddig uu Carlo Ancelotti u arko inuu yahay beddelka ugu habboon ee weeraryahanka reer France ee Karim Benzema.
Kabtanka Real Madrid ee Karim Benzema ayaa waxay da’diisu kusii siqaysaa 36 jir, waxaana xilli ciyaareedkan ku habsaday dhaawacyo tiro badan oo kusoo noqnoqday, kuwaas oo hoos u dhigay awooddiisii iyo waqtigiisii ciyaareed intaba.
Laacibkan ku guuleystay abaal-marinta Ballon d’Or bishii October ee sannadkii hore, ayaa waxa uu Los Blancos u saxeexayaa heshiis sannad ah oo Santiago Bernabeu kusii hayn doona illaa dhamaadka xilli ciyaareedka dambe, hase yeeshee Los Blancos ayaan isku hallayn karin kalidii xilli ciyaareedka soo socda maadaama ay dhaawacyo wiiqeen oo uu nuglaaday xilli ay da’diisu weyn tahay.
Real Madrid ayaa waxa la sheegay in hadda uu diiraddeeda soo galay weeraryahanka reer Brazil ee Gabriel Jesus oo uu si gaar ah u calaamadsaday madaxweyne Florentino Perez oo saluggiisa Karim Benzema uu sii badanayo maadaama 28 ciyaarood oo LaLiga ah uu kaliya dhaliyey 11 gool.
Arsenal ayaan la ogeyn sida ay ku ogolaan karto inay iibiso Gabriel Jesus oo xagaagii tegay ay kala soo wareegeen Manchester City, isla markaana 14 ciyaarood oo uu u sftay u dhaliyey shan gool iyo afar uu caawiyey, balse muddo saddex bilood ah u jiifay dhaawac jilibka ah.