Ruben Amorim ayaa si toos ah uga hadlay cidda ka shiftay xogta qolka labiska Manchester United ka dib markii uu ku dhawaaqay iney adag tahay in arrintaas la xakameeyo.
United ayaa ku soo laabatay wadada guusha ee Premier League iyagoo 2-1 ku garaacay Manchester City kulankii xiisaha badnaa ee ka dhacay Etihad Axaddii. Goolal ay dhaliyeen Bruno Fernandes iyo Amad Diallo ayaa ku filnaaday in ay guul ka gaaraan City, inkastoo Marcus Rashford iyo Alejandro Garnacho laga reebay kooxda.
Si kastaba ha ahaatee, markii kooxdu ku dhawaaqday safka ciyaarta ka hor, taageerayaal badan ayaa horeba u ogaa in Rashford iyo Garnacho aysan ku jiri doonin shaxda, maadaama horay loo shaaciyay safka kooxda.
Amorim, oo arrintan kaga hadlay shirkiisa jaraa’id ee ciyaarta ka dib, ayaa sheegay in ‘qarinta’ xogta qolka labiska ay tahay arrin adag oo loo baahan yahay in la xakameeyo, isagoo tilmaamay in ay jiraan dhowr waddo oo xogtaas uga baxi karto qolka labiska.
Wuxuu yiri:
“Waan ogahay sheekadaas. Ma garanayo, laakiin waxaan u maleynayaa inay adag tahay in arrintan la xakameeyo xilligan. Waxaa jira dad badan oo ka tirsan kooxda, ciyaartoydu waxay la hadlaan wakiiladooda, waxaadna la hadli kartaa saaxiibo, sidaas darteed wey adag tahay in la ogaado cidda bixisay xogta. Ma ahan wax wanaagsan, laakiin waa inaan u gudubnaa kulanka xiga.”
Amorim ayaa rajeynaya in safka uu soo xusho kulanka soo socda ee ay la ciyaarayaan Tottenham ee Carabao Cup uusan mar kale soo bixin kahor inta uusan isagu shaacin.
