U dhaqaaqida Victor Osimhen ee kooxda reer France ee Paris Saint-Germain , ayaa qarka u saaran inuu burburo, iyadoo wadahadaladii u dhexeeyay PSG iyo Napoli uu ku dhowyahay in lagu kala tago, hadii aysan tanaasul sameynin PSG.
PSG ayaa aad u doonaysay inay la soo wareegto 25 jirka reer Nigeria ka dib markii Kylian Mbappe uu si xor ah ugu biiray Real Madrid, waxaana wada xaajoodka fududeeyay wakiilka Osimhen, Roberto Calenda, kaasoo u duulay Paris.
Heshiiska Osimhen waxaa ku jira 130 milyan oo euro oo lagu burburin karo qandaraaskiisa, kaasi oo PSG aysan dooneynin inay bixiso oo ay rabto inay ka wadahadlaan.
Osimhen ayaa aad u doonaya inuu ka tago Napoli xagaagan, laakiin PSG ma rabto inay bixiso lacagta lagu burburin karo qandaraaska, taasoo la micno ah in wadahadalada ay ku jiraan xaalad adag.
Osimhen ayaa sidoo kale laga yaabaa inuu tixgeliyo dalabaadka horyaalka Sacuudiga iyadoo Napoli ay dooneyso Lukaku inuu ku dhex xarakeeyo Diego Maradona Stadium.
Sida laga soo xigtay Corriere dello Sport, kooxda heysata horyaalka Ligue 1 ayaan dooneynin inay wax ka badan 100 milyan oo euro ku qarashgareyso weeraryahanka Napoli, waxayna ka fiirsanayaan heshiis ciyaaryahan iyo lacag caddaan ah, oo ay suuragal tahay inay ku lug yeeshaan Carlos Soler, Nordi Mukiele iyo Lee Kang-oo ay kooxda Talyaanigu diiday.
Marka laga soo tago PSG, kooxaha Saudi Pro League ayaa soo bandhigay xiisaha Osimhen, waxaana saxiixiisa horey ugu tartamay kooxo cul culus sida Manchester United iyo Bayern Munich.
