Ciyaaryahanka garabka uga ciyaara kooxda koowaad ee Real Madrid, Vinicius Junior, ayaa u mahadceliyey qof walba oo Real Madrid ah ka dib markii uu ka soo muuqday liiska xiddigaha u tartamaya abaalmarinta Ballon d’Or 2024.

Vinicius ayaa wacdaro dhigay  kulankii shalay ee Real Madrid iyo Borussia Dortmund ee tartanka Champions League, wuxuuna dhaliyay saddexleydii uu kooxda Royal ku hogaamiyay soo laabasho cajiib ah kadib markii ay laba gool kaga hormareen 5-2.

Vinicius oo arintaas ka hadlaya ayaa yidhi”Runtii aad ayaan ugu faraxsanahay sababtoo ah waxaan awooday inaan u soo celiyo nicmada qof kasta oo ku kalsoon awoodahayga, gaar ahaan Madaxweynaha. Florentino Perez, kaasoo wax walba u sameeyay inuu ila soo wareego.”

Isaga oo hadalkiisa sii wata ayuu yidhi: “Qof walba waxa uu i rumaysnaa tan iyo markii aan jiray lix iyo toban jir, markii aan joogay Rio de Janeiro iyo Flamengo, ilaa aan gaadhay saddexleydii ugu horreysay ee Champions League”.

Waxa uu intaa ku daray: “Wax badan ayaan horumaray, laakiin sidoo kale waxaan soo maray xaalado badan oo adag si aan u gaaro meesha aan joogo da’dan yar waxaan ahay kaliya 24 sano jir.”

Wuxuu kusoo gaba gabeeyay: “Waxaan rajeynayaa in qof walba, ha ahaado Brazil ama aduunka oo dhan, inay igu taageeri doonaan inaan ku guuleysto Ballon d’Or isniinta oo aan rumeeyo riyadeyda”.a