Virgil van Dijk ayaa sheegay in ay Liverpool ogaan doonto ilaa dhamaadka sanadka hadii ay ku jiraan tartanka horyaalka premier League xilli ciyaareedkan.
Reds ayaa si fiican ku bilaabatay xilli ciyaareedka iyaga oo badiyay 5 ka mid ah 6-dii kulan ee ay ciyaareen premier League ilaa haatan.
Waxa si weyn loo hadal hayay in kooxaha Arsenal iyo Man City ay ku tartami doonaan horyaalka laakiin qaab ciyaareedka Liverpool ayaa keenay hadal kale.
Laakiin inkasta oo ay si fiican ku bilowdeen xilli ciyaareedka, Van Dijk ayaan ka hadlayn tartanka horyaalka ilaa laga gaadho dhamaadka sanadka.
“Waxaan heysanaa koox aad u wanaagsan – isku dhafan khibrad iyo karti – iyo ciyaaryahano ku jira marxalad aad u wanaagsan xirfaddooda. Markaa way wanaagsan tahay inaan aragno qaabka aan u ciyaareyno”ayuu yidhi.
“Wakhtigan anigu ma eegayo kala saraynta horyaalka sababta oo ah December ayaa ah bil muhiim ah, wakhtigan kooxuhu si fiican ayay u ciyaarayaan wax dhaawacyo ahna ma soo gaadhayaa laakiin aan eegno wakhtiga soo socda”.
