Wararka ka imanaya talkSPORT ayaa sheegaya in ugu yaraan saddex kooxood oo ka tirsan horyaalka Saudi Pro League ay daneynayaan inay la saxiixdaan Marcus Rashford, oo ka tirsan Manchester United.

Milkiilayaasha cusub ee United, shirkadda INEOS, ayaa diyaar u ah inay u oggolaadaan Rashford inuu ka tago kooxda bisha Janaayo.

Tani waxay timid kaddib wareysi lala yeeshay Rashford toddobaadkan, oo uu ku sheegay inuu diyaar u yahay inuu wajahayo caqabad cusub oo xirfaddiisa ah.

Xiddiga xulka England ayaa la kulmay dhabar-jab kale kaddib markii tababare Ruben Amorim uu ka reebay shaxdii uu kula ciyaaray Tottenham Hotspur wareegii siddeed-dhamaadka Carabao Cup, ciyaar ay United ku guuldarreysatay 4-3.

Iyadoo mustaqbalka Rashford uu mugdi ku jiro, waxaa la xaqiijiyay in kooxaha Al-Ahli, Al-Ittihad, iyo Al-Qadsiah ay xiiso dhab ah u muujiyeen 27-jirkan.

Kooxda Al-Ahli ayaa loo arkaa kuwa ugu dhow saxiixa Rashford, laakiin waa inay marka hore iska iibiyaan ama iska diiwaangeliyaan mid ka mid ah xiddigahooda ajaanibka ah si ay ugu suurto gasho inay la soo wareegaan xiddigan heerka caalami.

Waxaa la sugayaa inuu ka soo baxo go’aan rasmi ah oo ku saabsan mustaqbalka Rashford, iyadoo kooxaha xiiseynaya ay diyaarinayaan dalabyo waaweyn.