Wayne Rooney ayaa arrin la yaab leh ku sameeyay taageerayaasha kubadda cagta kadib markii uu shaqada kaaliyaha tababaraha ee kooxda Plymouth Argyle u magacaabay Mike Phelan, oo hore uga soo shaqeeyay Manchester United.Phelan wuxuu horey usoo noqday tababaraha Rooney Ee United asagoo ka hoos shaqeynaya Sir Alex Fergusson.
Pete Shuttleworth, oo hore u ahaa kaaliyaha Rooney, ayaa shaqada isaga tagay sababo shaqsiyeed dartood, taasoo keentay in kooxda Argyle ay sameyso isbeddel ku yimaadda shaqaalaha farsamada.
Rooney, oo ka hadlayay go’aanka, ayaa yiri: “Aad ayaan uga xumahay inaan arko Pete oo kooxda ka tagaya. Waa qof aan si dhow ula shaqeynayay tan iyo markii aan tababare u noqday markii ugu horreysay Derby County, wuxuuna ahaa saaxiib dhow.
“Pete wuxuu ku mashquulsan yahay arrimo shaqsiyeed oo u baahan diiradda iyo wakhti. Waxaan si buuxda u ixtiraameynaa arrintaas, waxaana si wadajir ah u go’aansannay inaan kala tagno.”
Phelan, oo waayo-aragnimo badan leh, ayaa kasoo shaqeeyay Manchester United intii u dhaxaysay 2008-2012, isagoo lasoo shaqeeyay Sir Alex Ferguson, wuxuuna la qaaday Premier League iyo Champions League.
Rooney ayaa sheegay inuu ku faraxsan yahay inuu dib ula shaqeeyo Phelan: “Mike waa qof aan si fiican u garanayo maadaama aan si wadajir ah uga soo shaqeynay Manchester United. Wuxuu leeyahay khibrad aad u sarreysa oo heerka ugu sareeya ah. Aad ayaan ugu faraxsanahay inaan keeno Argyle, waxaana rajeynayaa inuu si degdeg ah shaqadiisa u bilaabo.”
Mike Phelan wuxuu sidoo kale soo maray kooxaha Norwich City iyo Hull City, kahor inta uusan dib ugu laaban Manchester United 2018-kii, halkaas oo uu muddo afar sano ah ka shaqeynayay.
