Wararka xanta ah ayaa sii socda mustaqbalka xiddiga heerka caalami ee dalka England Trent Alexander-Arnold ee Liverpool, iyadoo qandaraaskiisu uu ku dhow yahay dhamaadka bisha June ee soo socota, iyadoo Real Madrid ay dooneyso inay la soo saxiixato.

Real Madrid ka dib markii Dani Carvajal uu dhaawac ka soo gaaray jilibka iyo da’da xiddiga reer Spain waxa ay Los Blancos ku qasbaysaa in ay xoojiso daafaca Midig.

Ciyaaryahanka reer England qandaraaskiisu wuxuu dhacayaa bisha June ee soo socota walina wax heshiis cusub ah uma saxiixin.

Wargeyska The Independent ayaa xaqiijiyay in Trent Alexander-Arnold uu og yahay in Real Madrid ay u soo bandhigi karto wax aysan Liverpool awoodin, hal dhinac ka badan.

Wararka ayaa sheegaya in ciyaaryahanka reer England uu aaminsan yahay in joogitaanka Real Madrid ay ka dhigi doonto inuu helo hadal haynta saxaafada in badan taas oo ka caawin karta ku guulaysiga abaalmarinta Ballon d’Or.

Soo jiidashada Real Madrid ayaa soo jiidanaysa ciyaaryahanka reer England, kaasoo gartay in uu wax walba siiyay Liverpool kulana guulaystay koobab badan oo kala duwan.

Dhinaca kale joogitaanka Jude Bellingham ayaana fududeyneysa, maadaama uu saaxiib dhow la yahay Trent Alexander-Arnold.

Bixitaanka Jurgen Klopp ayaa sidoo kale ah arrin ay tahay in la tixgeliyo, maadaama xiriirka xiddiga iyo tababaruhu uu ahaa mid fiican laakiin uuna ilaa haatan xidhiidh xoogan la lahayn Arne Slot.

Wargeyska ayaa tilmaamay in hadaladii hore ee Arnold ee tilmaamayay inuu raadinayo abaal-marinno shaqsiyeed ay ka dhigayso in uu ku sii dhawaado Real Madrid.